هــــو:
كان يوم غريب لما رحت اشوف العروسة...امى قالت لى لما العروسة تدخل وتحط صينية الشربات اطلع 100جنـيه واحطها فى الصينية كما هو متعارف
ولما شفت العروسة غيرت وطلعت خمسين جنيه...
اعتقد كان كفايه عليها قوى الخمسين جنيه ....وتحمد ربنا انى ضربت لخمة وبدل مااطلع عشرين جنيه طلعت بالغلط خمسين
...موش باقولكم...... مغفل
هــــى:
اول ماطلعت وشفته كان نفسى ادلق صينية الشربات على هدومه..
.بس امه كانت داعية له تراجعت فى اخر لحظة ..اصلى خفت انى لو دلقت شربات الورد على هدوم العريس حاتعب قوى فى تنضيف السجادة تانى يوم ...
وبعد ماتجوزته قلت موش كان برضه نضافة سجادة احسن من تنضيف جيوبه الفاضية....
موش بأقولكم..... مغفلة
هــــو:
اسمى هشام
شاب متوسط الحال ..بشهادة جامعية زى كل الشباب...
وبما انى دخلت الجامعة فاكيد كان ليا صداقـــات. .قصدى وقعت فى الحب اكتر من مرة...
بس عارفين لما اتخرجت حسيت انه ماكانشى حب وانه لعب عيال زى ماكانت امى بتقول...
وانا نازل كل يوم الكلية امى توصينى الوصايا العشرة.....
خد بالك من السكة وولاد الحرام وبنات الجامعة
- وياهشام حط فى دماغك ياحبيبى انت شاب.. ومن حقك تحب
انا موش حاامنعك ....حب براحتك.... لكن لما تحب تتجوز انا اللى حاجيبلك العروسة
وسمعت كلام امى موش باقولكم ......مغفل
هــــى:
انا ..مها
بنت حلال وطيبة واللى فى قلبى على لسانى زى اى بنت بانكسف
لكن ماينضحكشى عليا
وجدتى ربتنى وعلمتنى كتير
وكانت ديما تخوفنى وتقولى اوعى تعرفى شباب...البنت المؤدبة ماتعرفشى غير راجل واحد بس ...هو جوزها اللى حاتتجوزوا
وكبرت وكبرت معايا مشكلتى (الخوف من اى راجل)
وفضلت استنى الراجل اللى حايجى يدق الباب ويطلبنى ويكون هو حلمى.. راجل طيب وشجاع لما تميل بيا الدنيا اتسند على كتفه .. ومعاه احس
بالامان
ومع مرور الوقت وتأخر سن الجواز... الحلم الجميل بيبهت..والصورة بتتغير
والبنت ساعات بترضى براجل كويس وخلاص اى نعم.. موش توم كروز.. بس اهو راجل..
اى نعم.. بكرش وقصير واصلع حبيتين .. بس راجل
وبعد الجواز تندم الواحدة مننا وتقول.. موش كنت استنيت شوية يمكن توم كروز كان حايخبط على باب بيتنا
واقول ايه بس وافقت على اول واحد طلبنى وده كان هشام
موش باقولكم .....مغفلة
اعترافات...مغفل....و...مغفلة *********مغفلييييييين اوى
ايه ده رايح فين استنى هقولك
العرض العادي
